1) Kommuneplanen står i ei særstilling ved at den omhandlar målsetjingar for mange politikkområde (langsiktig strategi) samstundes som den synar korleis areala i kommunen skal nyttast. Kommuneplanen vert fornya (ofte kaldt rullering) kvart 4. år.
Elles er det tre hovudkategoriar av planar i kommunen:

1) Kommunedelplanar (hovudplanar) gjeld spesifikke politikkområde som kommunen sin bustadpolitikk, sosialpolitikk, næringspolitikk, miljøpolitikk osb. Planane vert fornya (rullert) med jamne mellomrom - gjerne kvart 2. eller kvart 4. år.

2) Areal- og reguleringsplanar
Alt areal i kommunen er sett av til eit føremål som bustader, næring, offentleg verksemd eller LNF (landbruk, natur og fritid). Dette finn du i arealdelen i kommuneplanen eller kommunedelplanar som t.d. planen for Knarvik, Isdal, Alver.

I tillegg fins det ei rekkje meir detaljerte reguleringsplanar for einskilde område som syner t.d. korleis eit areal sett av til bustadtomter skal nyttast - vegløysing, leikeplass og anna friareal, bygningsmasse osb.

Nær alle areal- og reguleringsplanar i kommunen er samla i BraPlan. Du kan og nytte nordhordlandskart.no som innfallsport til slike planar. (Finn t.d. gards- og bruksnummer i matrikkelen der.)

3) ØkonomiplanØkonomiplanen for Lindås kommune vert rullert kvart år, og synar i detalj korleis midlane skal skaffast og nyttast kommande år (budsjett). Planen skisserer og korleis inntekter og kostnader/prioriteringar kan verte dei påfølgjande 3 åra.

Økonomiplanen inneheld
-- investeringsbudsjett: plan som gjeld større investeringar som t.d. bygging av skular, kjøp av bustader, tilrettelegging av industriområde.-- driftsbudsjett: plan som gjeld drift av kommunen som t.d. oversyn over forventa skatteinntekter, midlar til kulturføremål, løn til tilsette, straum til offentlege bygg.

Planprosess
Prosessane ved utforming/rullering av kommuneplanen, kommunedelplanar og regulerings-/utbyggingsplanar er bestemt i Plan- og bygningslova (Pbl). Desse skal m.a. sikre at innbyggjarar og andre skal få høve til å setja seg inn i kva som skjer og gje dei høve til å komme med innspel eller gje uttale til planforslaga. Også andre planar som i utgangspunktet ikkje er regulert i Pbl kan få status som kommunedelplan og dermed følgje same prosess.